Tweede sensusopname
26 1 Ná die ramp het die Here vir Moses en vir Eleasar seun van die priester Aäron gesê: 2 "Neem 'n sensus op van die hele volk Israel, van elke Israeliet van twintig jaar en ouer wat vir militêre diens geskik is. Julle moet dit familiegewys doen." 3 Moses en die priester Eleasar het toe in die Moabsvlakte regoor Jerigo aan die Jordaan die opname gemaak 4 van almal van twintig jaar en ouer soos die Here vir Moses beveel het. Hier volg die opgawe van die Israelitiese families wat uit Egipte gekom het: 5 Ruben, oudste seun van Israel: die Rubenfamilies was dié van Ganok, 6 Gesron en Karmi. 7 Die Rubenfamilies was altesaam drie en veertig duisend sewe honderd en dertig man. 8 Pallu se seun was Eliab, 9 en sy seuns was Nemuel, Datan en Abiram. Dit was dié Datan en Abiram wat as leiers deur die vergadering verkies was, maar teen Moses en Aäron in opstand gekom het toe die bende van Korag teen die Here in opstand gekom het. 10 Die grond het oopgeskeur en hulle ingesluk saam met Korag wie se bende omgekom het toe die vuur twee honderd en vyftig man verteer het. Dit was 'n waarskuwing vir Israel. 11 Die seuns van Korag het egter nie gesterf nie. 12 Die Simeonfamilies was dié van Jemuel, Jamin, Jakin, 13 Serag en Saul. 14 Die Simeonfamilies was altesaam twee en twintig duisend twee honderd man. 15 Die Gadfamilies was dié van Sifion, Gaggi, Suni, 16 Osni, Eri, 17 Arod en Areli. 18 Die Gadfamilies was altesaam veertig duisend vyf honderd man. 19 Er en Onan was seuns van Juda, maar hulle is vroeër al in Kanaän oorlede. 20 Die Judafamilies was dié van Sela, Peres en Serag. 21 Die Peresfamilies was dié van Gesron en Gamul. 22 Die Judafamilies was altesaam ses en sewentig duisend vyf honderd man. 23 Die Issaskarfamilies was dié van Tola, Puwwa, 24 Jasub en Simron. 25 Die Issaskarfamilies was altesaam vier en sestig duisend drie honderd man. 26 Die Sebulonfamilies was dié van Sered, Elon en Jagleël. 27 Die Sebulonfamilies was altesaam sestig duisend vyf honderd man. 28 Die Joseffamilies was dié van Manasse en Efraim. 29 Makir, voorvader van Gilead, was uit die Manassefamilie. 30 Die Gileadfamilie was dié van Iëser, Gelek, 31 Asriël, Sekem, 32 Semida, Gefer 33 en Selofgad Selofgad seun van Gefer het nie seuns gehad nie, net dogters. Sy dogters was Magla, Noa, Gogla, Milka en Tirsa. 34 Die Manassefamilies was altesaam twee en vyftig duisend sewe honderd man. 35 Die Efraimfamilies was dié van Sutelag, Beker en Tagan. 36 Eran was uit die Sutelagfamilie. 37 Die Efraimfamilies was altesaam twee en dertig duisend vyf honderd man. Dit was al die Joseffamilies. 38 Die Benjaminfamilies was dié van Bela, Asbel, Agiram, 39 Sefufam en Gufam. 40 Die Belafamilies was dié van Ard en Naäman. 41 Die Benjaminfamilies was altesaam vyf en veertig duisend ses honderd man. 42 Die Danfamilie was dié van Sugam en sy nageslag Dit was die enigste Danfamilie. 43 Die Sugamfamilie was altesaam vier en sestig duisend vier honderd man. 44 Die Aserfamilies was dié van Jimna, Jiswi en Beria. 45 Die Beriafamilies was dié van Geber en Malkiël. 46 Aser het ook 'n dogter gehad, Serag. 47 Die Aserfamilies was altesaam drie en vyftig duisend vier honderd man. 48 Die Naftalifamilies was dié van Jagseël, Guni, 49 Jeser en Sillem. 50 Die Naftalifamilies was altesaam vyf en veertig duisend vier honderd man. 51 Die Israeliete was altesaam ses honderd en een duisend sewe honderd en dertig man. 52 Daarna het die Here vir Moses gesê: 53 "Verdeel nou die land tussen die families en gee aan elkeen 'n eiendom volgens sy grootte: 54 aan 'n groot familie 'n groot eiendom en aan 'n klein familie 'n kleiner eiendom. Elkeen moet sy eiendom ontvang ooreenkomstig sy getal. 55 Die land moet verdeel word deur te loot. Elke stam moet 'n eiendom ontvang. 56 Bepaal vir elkeen sy eiendom deur loting tussen die groter en die kleiner stamme." 57 Die Levifamilies wat getel is, was dié van Gerson, Kehat en Merari 58 en ook dié van Libni, Hebron, Magli, Musi en Korag. Kehat was die voorvader van Amram, 59 en Amram se vrou was Jogebed, ook uit die nageslag van Levi. Sy is in Egipte gebore en haar en Amram se kinders was Aäron en Moses en hulle suster Mirjam. 60 Aäron was die vader van Nadab, Abihu, Eleasar en Itamar. 61 Nadab en Abihu is dood toe hulle ongeoorloofde vuur na die altaar toe gebring het. 62 Die Leviete van 'n maand en ouer was altesaam drie en twintig duisend man. Hulle is nie saam met die ander Israeliete getel nie, want hulle het nie self eiendom onder die Israeliete gekry nie. 63 Al hierdie mense is getel deur Moses en die priester Eleasar in die Moabsvlakte regoor Jerigo aan die Jordaan. 64 Onder hulle was daar egter niemand van die Israeliete wat deur Moses en die priester Aäron in die Sinaiwoestyn getel is nie. 65 Die Here het destyds vir daardie Israeliete gesê dat hulle beslis in die woestyn sou sterf. Nie een van húlle het toe oorgebly nie, behalwe Kaleb seun van Jefunne, en Josua seun van Nun.