Israel word vir militêre diens getel

1 ¹ Die Here het met Moses gepraat in die tent van ontmoeting in die Sinaiwoestyn. Dit was op die eerste dag van die tweede maand, in die tweede jaar nadat Israel uit Egipte weggetrek het. ^2-3 Die Here het gesê: "Jy en Aäron moet al die Israeliete man vir man tel volgens afkoms en familie; skryf die name op van elke manlike persoon van twintig jaar en ouer, elkeen in Israel wat vir militêre diens geskik is en wat in leërafdelings ingedeel is. ⁴ Julle moet hierin bygestaan word deur persone wat hoofde is van hulle families, een uit elke stam. ⁵ En dit is die name van die manne wat vir julle moet bystaan: uit die stam Ruben: Elisur seun van Sedeür; ⁶ uit Simeon: Selumiël seun van Suri-Saddai; ⁷ uit Juda: Nagson seun van Amminadab; ⁸ uit Issaskar: Netanel seun van Suar; ⁹ uit Sebulon: Eliab seun van Gelon; ¹⁰ uit die nageslag van Josef, uit Efraim: Elisama seun van Ammihud, en uit Manasse: Gamliël seun van Pedasur; ¹¹ uit die stam Benjamin: Abidan seun van Gidoni; ¹² uit Dan: Agiëser seun van Ammi-Saddai; ¹³ uit Aser: Pagiël seun van Okran; ¹⁴ uit Gad: Eljasaf seun van Reüel; ¹⁵ uit Naftali: Agira seun van Enan." ¹⁶ Hulle was die manne wat uit die vergadering aangewys is, leiers van die stamme van hulle voorvaders en stamhoofde van Israel. ¹⁷ Moses en Aäron het hierdie manne wie se name genoem is, laat kom. ¹⁸ Op die eerste dag van die tweede maand het hulle toe die hele volk bymekaargeroep. Daarna het elke weerbare man sy afkoms volgens stam en familie opgegee, almal van twintig jaar en ouer. ¹⁹ Moses het hulle in die Sinaiwoestyn getel, soos die Here hom beveel het. ^20-43 Die manlike afstammelinge van die onderskeie stamvaders was:
  van Ruben die oudste seun van Israel 46 500
  van Simeon 59 300
  van Gad 45 650
  van Juda 74 600
  van Issaskar 54 400
  van Sebulon 57 400
  van Josef se seuns:
    Efraim 40 500
    Manasse 32 200
  van Benjamin 35 400
  van Dan 62 700
  van Aser 41 500
  van Naftali 53 400
Dit was in die geval van elke stam die getal weerbare manne van twintig jaar en ouer, getel volgens afkoms en familie. ^44-46 Dit was dan die getal van die manne wat deur Moses, Aäron en die twaalf Israelitiese stamhoofde getel is. Altesaam was die getelde Israeliete 603 550. Dit was die weerbare manne van twintig jaar en ouer, getel volgens families. ⁴⁷ Die Leviete is nie as afsonderlike stam bygetel nie. ⁴⁸ Die Here het naamlik vir Moses gesê: ⁴⁹ "Die stam Levi moet jy nie tel nie en hulle getal moet jy nie by dié van die Israeliete voeg nie. ⁵⁰ Jy moet die Leviete aanstel om toesig te hou oor die tabernakel met die getuienis, oor al sy gereedskap en al sy toebehore. Hulle moet die tabernakel en sy gereedskap dra; net húlle moet daarmee werk; en hulle moet hulle tente rondom die tabernakel opslaan. ⁵¹ As die tabernakel verskuif moet word, moet die Leviete dit uitmekaarhaal; en as dit opgeslaan moet word, moet hulle dit opslaan. 'n Onbevoegde persoon wat nader kom om te help, moet doodgemaak word. ⁵² "Die ander stamme van Israel moet hulle tente opslaan, elke stam op sy eie staanplek, rondom sy eie vaandel, ingedeel by sy eie leërafdeling, ⁵³ maar die Leviete moet hulle tente rondom die tabernakel met die getuienis opslaan, sodat my toorn nie oor die Israeliete kom nie. So moet die Leviete dan vir die tabernakel met die getuienis sorg." ⁵⁴ Die Israeliete het alles presies gedoen soos die Here vir Moses beveel het.